ਤੁਹਾਨੂੰ ਵੀ WhatsApp ‘ਤੇ ਆਉਂਦੇ ਹਨ ਆਰਡਰ ਡਿਲਵਰੀ ਮੈਸੇਜ ਤਾਂ ਹੋ ਜਾਓ ਸਾਵਧਾਨ ! Jio, Airtel ਤੇ Vi ਨੇ ਦਿੱਤੀ ਨੈਸ਼ਨਲ ਸਕਿਓਰਟੀ ਦੀ ਚਿਤਾਵਨੀ
ਅਕਸਰ ਜਦੋਂ ਤੁਸੀਂ ਆਨਲਾਈਨ ਖਰੀਦਦਾਰੀ ਕਰਦੇ ਹੋ ਤਾਂ ਈ-ਕਾਮਰਸ ਸਾਈਟਾਂ ਤੁਹਾਨੂੰ ਮੈਸੇਜਿਜ਼ ਰਾਹੀਂ ਸਾਰੇ ਅਪਡੇਟ ਦਿੰਦੀਆਂ ਹਨ। ਹੁਣ ਕੁਝ ਦਿਨਾਂ ਤੋਂ ਕੰਪਨੀਆਂ ਨੇ ਵ੍ਹਟਸਐਪ ‘ਤੇ ਇਹ ਸੰਦੇਸ਼ ਭੇਜਣੇ ਸ਼ੁਰੂ ਕਰ ਦਿੱਤੇ ਹਨ।
ਇਸ ਤੋਂ ਇਲਾਵਾ ਹੋਰ ਪਲੇਟਫਾਰਮ, ਚਾਹੇ ਉਹ ਬੈਂਕ ਹੋਵੇ ਜਾਂ ਸ਼ਾਪਿੰਗ ਕੰਪਲੈਕਸ, ਨੇ ਵ੍ਹਟਸਐਪ ‘ਤੇ ਆਪਣੇ ਆਫਰ ਤੇ ਵੇਰਵੇ ਭੇਜਣੇ ਸ਼ੁਰੂ ਕਰ ਦਿੱਤੇ ਹਨ। ਪਰ ਟੈਲੀਕਾਮ ਕੰਪਨੀਆਂ Jio, Airtel ਤੇ Vi ਨੇ ਇਸ ‘ਤੇ ਇਤਰਾਜ਼ ਜਤਾਇਆ ਹੈ। ਇਕ ਨਵੀਂ ਜਾਣਕਾਰੀ ਸਾਹਮਣੇ ਆਈ ਹੈ ਕਿ ਸੈਲੂਲਰ ਆਪਰੇਟਰਜ਼ ਐਸੋਸੀਏਸ਼ਨ ਆਫ ਇੰਡੀਆ (COAI) ਨੇ ਇਸ ਨਵੇਂ ਬਦਲਾਅ ਦਾ ਵਿਰੋਧ ਕੀਤਾ ਹੈ।
ਪੱਤਰ ਲਿਖ ਕੇ ਜਤਾਈ ਚਿੰਤਾ
ਐਸੋਸੀਏਸ਼ਨ ਨੇ ਸਕੱਤਰ ਨੀਰਜ ਮਿੱਤਲ ਨੂੰ ਇਕ ਪੱਤਰ ਲਿਖਿਆ, ਜਿਸ ਵਿਚ ਸੀਓਏਆਈ ਨੇ ਮਾਈਕ੍ਰੋਸਾਫਟ ਤੇ ਐਮਾਜ਼ੋਨ ਵਰਗੀਆਂ ਹੋਰ ਯੂਜ਼ਰਜ਼ ਤਕਨਾਲੋਜੀ ਕੰਪਨੀਆਂ ‘ਤੇ ਇਹ ਸੰਦੇਸ਼ ਭੇਜ ਕੇ ਕਾਨੂੰਨੀ ਦੂਰਸੰਚਾਰ ਮਾਰਗ ਨੂੰ ਬਾਈਪਾਸ ਕਰਨ ਦਾ ਦੋਸ਼ ਲਗਾਇਆ ਹੈ। ਇਸ ਕਾਰਨ ਕੇਂਦਰ ਤੇ ਦੂਰਸੰਚਾਰ ਕੰਪਨੀਆਂ ਨੂੰ 3000 ਕਰੋੜ ਰੁਪਏ ਦਾ ਸਾਲਾਨਾ ਮਾਲੀਆ ਨੁਕਸਾਨ ਹੋ ਸਕਦਾ ਹੈ।
ਇਸ ਤੋਂ ਇਲਾਵਾ ਇਹ ਵੀ ਦੋਸ਼ ਲਾਇਆ ਗਿਆ ਕਿ ਇਹ ਨਾ ਸਿਰਫ਼ ਲਾਇਸੈਂਸ ਤੇ ਸੁਰੱਖਿਆ ਨਿਯਮਾਂ ਦੀ ਉਲੰਘਣਾ ਹੈ ਸਗੋਂ ਇਸ ਨਾਲ ਸਰਕਾਰੀ ਮਾਲੀਏ ਤੇ ਵਿਦੇਸ਼ੀ ਮੁਦਰਾ ਆਮਦਨ ਦਾ ਵੀ ਨੁਕਸਾਨ ਹੁੰਦਾ ਹੈ। ਇਸ ਪੱਤਰ ਵਿਚ ਸੀਓਏਆਈ ਨੇ ਇਸ ਗੱਲ ‘ਤੇ ਵੀ ਜ਼ੋਰ ਦਿੱਤਾ ਹੈ ਕਿ ਸਰਕਾਰ ਨੂੰ ਅਜਿਹੇ ਸੰਦੇਸ਼ਾਂ ਲਈ ਵ੍ਹਟਸਐਪ ਤੇ ਟੈਲੀਗ੍ਰਾਮ ਵਰਗੇ ਪਲੇਟਫਾਰਮਾਂ ਨੂੰ ਨਾਜਾਇਜ਼ ਰੂਟ ਐਲਾਨ ਦੇਣਾ ਚਾਹੀਦਾ ਹੈ।
ਕੌਮੀ ਸੁਰੱਖਿਆ ਲਈ ਖ਼ਤਰਾ
ਐਸੋਸੀਏਸ਼ਨ ਨੇ ਕਿਹਾ ਕਿ ਟੈਲੀਕਾਮ ਕੰਪਨੀਆਂ ਦੀ ਨਿਯਮਤ ਐਸਐਮਐਸ ਸੇਵਾ ਨੂੰ ਅਜਿਹੇ ਸੰਦੇਸ਼ਾਂ ਲਈ ਹੀ ਤਿਆਰ ਕੀਤਾ ਗਿਆ ਹੈ। ਇਸਦੇ ਲਈ ਕੰਪਨੀਆਂ ਨੂੰ ਲਾਇਸੈਂਸ ਮਿਲਦੇ ਹਨ, ਪਰ ਹੁਣ ਇਹ ਕੰਪਨੀਆਂ ਇਨ੍ਹਾਂ ਲਾਇਸੈਂਸਿੰਗ ਨਿਯਮਾਂ ਤੇ ਇਨ੍ਹਾਂ ਨੂੰ ਬਾਈਪਾਸ ਕਰਦੀਆਂ ਹਨ ਤੇ ਲਾਇਸੰਸਸ਼ੁਦਾ ਰੂਟ ਦੀ ਬਜਾਏ ਓਟੀਟੀ ਪਲੇਟਫਾਰਮ ਯਾਨੀ ਵ੍ਹਟਸਐਪ ਤੇ ਟੈਲੀਗ੍ਰਾਮ ਦੀ ਵਰਤੋਂ ਕਰਦੀਆਂ ਹਨ, ਜਿਸ ਨਾਲ ਟ੍ਰੈਫਿਕ ਡਾਇਵਰਟ ਹੁੰਦਾ ਹੈ
ਜਿਵੇਂ ਕਿ ਅਸੀਂ ਜਾਣਦੇ ਹਾਂ ਕਿ ਇਹ ਪਲੇਟਫਾਰਮ ਐਂਡ-ਟੂ-ਐਂਡ ਐਨਕ੍ਰਿਪਟਡ ਹਨ, ਇਸ ਲਈ ਇਹ ਤਰੀਕਾ ਯੂਜ਼ਰਜ਼ ਦੀ ਸੁਰੱਖਿਆ ਨੂੰ ਪ੍ਰਭਾਵਿਤ ਕਰਦਾ ਹੈ। ਨਾਲ ਹੀ ਇਹ ਤਰੀਕਾ ਸਰਕਾਰ ਦੀ ਨਿਗਰਾਨੀ ਤੋਂ ਬਾਹਰ ਹੈ, ਜਿਸ ਕਾਰਨ ਇਹ ਰਾਸ਼ਟਰੀ ਸੁਰੱਖਿਆ ਦਾ ਮੁੱਦਾ ਹੈ, ਜਿਸ ਤੋਂ ਇਸ ਨੂੰ ਬਚਾਉਣਾ ਜ਼ਰੂਰੀ ਹੈ।
